Inson hayotida oila eng muqaddas va bebaho maskan hisoblanadi. Oila — mehr-oqibat, tarbiya, sadoqat va ezgulik manbai bo‘lib, jamiyatning eng muhim bo‘g‘inidir. Har yili 15-may sanasi dunyo bo‘ylab Xalqaro oila kuni sifatida keng nishonlanadi. Ushbu sana oilaning jamiyat taraqqiyotidagi o‘rni, farzand tarbiyasi, oilaviy qadriyatlarni asrash hamda mustahkam oilalarni qo‘llab-quvvatlashga qaratilgani bilan ahamiyatlidir.
Xalqaro oila kuni 1993-yilda Birlashgan Millatlar Tashkiloti tomonidan ta’sis etilgan bo‘lib, 1994-yildan boshlab xalqaro miqyosda nishonlanib kelinmoqda. Mazkur kunni belgilashdan asosiy maqsad — oilalarning ijtimoiy hayotdagi o‘rni va ahamiyatiga jamoatchilik e’tiborini qaratish, oilalarni qo‘llab-quvvatlash hamda sog‘lom oilaviy muhitni shakllantirishdan iboratdir.
Oila — insonning ilk tarbiya maskani. Farzand aynan oilada yaxshi va yomonni ajratishni, kattalarga hurmat, kichiklarga izzat ko‘rsatishni, mehnatsevarlik va vatanparvarlik kabi insoniy fazilatlarni o‘rganadi. Shu boisdan ham har bir davlat va jamiyat uchun mustahkam oila masalasi doimo ustuvor yo‘nalishlardan biri bo‘lib kelgan.
Bugungi globallashuv davrida oilaviy qadriyatlarni asrab-avaylash, yoshlarni oilaviy hayotga tayyorlash, farzand tarbiyasiga mas’uliyat bilan yondashish yanada muhim ahamiyat kasb etmoqda. Chunki sog‘lom va ahil oilada ulg‘aygan yoshlar kelajakda jamiyatning yetuk, bilimli va ma’naviyatli vakillari bo‘lib voyaga yetadi.
O‘zbekiston Respublikasida ham oilani qo‘llab-quvvatlash, xotin-qizlar va yoshlar manfaatlarini himoya qilish, farzandlar uchun munosib sharoit yaratish davlat siyosatining muhim yo‘nalishlaridan biri hisoblanadi. Yurtimizda oilalarni mustahkamlash, ajrimlarning oldini olish, onalik va bolalikni muhofaza qilish, yosh oilalarni qo‘llab-quvvatlash borasida keng ko‘lamli ishlar amalga oshirilmoqda.
Ayniqsa, mahallalarda oilaviy muhitni yaxshilash, ma’naviy-ma’rifiy tadbirlarni tashkil etish, yoshlarni sog‘lom turmush tarziga yo‘naltirish orqali oilalarning farovonligini ta’minlashga alohida e’tibor qaratilmoqda. Oila tinch bo‘lsa, mahalla tinch bo‘ladi, mahalla tinch bo‘lsa esa jamiyatda barqarorlik va taraqqiyot ta’minlanadi.
Bugungi kunda har bir inson oilasi bag‘rida o‘zini baxtli va xotirjam his etishi uchun oilaviy qadriyatlarni mustahkamlash, o‘zaro hurmat va mehr-oqibatni yanada kuchaytirish muhim vazifalardan biridir. Zero, oila — inson baxtining poydevori, jamiyat taraqqiyotining tayanchi va kelajak avlod tarbiyasining muhim maskanidir.
15-may — Xalqaro oila kuni barchamizni oila qadri, ota-ona mehri, farzand tarbiyasi va oilaviy birdamlik haqida yana bir bor chuqur o‘ylashga undaydi. Har bir xonadonda tinchlik, mehr-oqibat va baxt hukm sursin. Mustahkam oilalar esa jamiyat ravnaqining mustahkam tayanchi bo‘lib qolaversin.
