Korrupsiya bu — jamiyatni turli yo‘llar bilan tanazzulga olib keladigan dahshatli illatdir. Mazkur illat demokratiya va huquq ustuvorligi asoslariga putur yetkazadi, inson huquqlari buzilishiga olib keladi, bozorlar faoliyatiga to‘sqinlik qiladi, hayot sifatini yomonlashtiradi va odamlar xavfsizligiga tahdid soladigan uyushgan jinoyatchilik, terrorizm va boshqa illatlar ildiz otib, gullashi uchun sharoit yaratib beradi.
Korrupsiya (lot. Corrumpere — buzmoq) termini odatda mansabdor shaxslar tomonidan ularga berilgan mansab vakolatlari va huquqlardan o‘zlarining shaxsiy manfaatlarini ko‘zlab qonunchilik va ahloq qoidalariga zid ravishda foydalanishini anglatadi.
Ko‘p hollarda bu atama siyosiy elitadagi byurokratik apparatga qarata ishlatiladi. Korrupsiya ko‘plab davlatlarning jinoyat va ma’muriy qonunchiligi bilan huquqqa qarshi harakat sifatida ta’qib qilinadi.
Korrupsiyaning tarixiy o‘zaklari juda qadimga borib taqalgan. O‘sha davrlarda bu normal holat sifatida qabul qilingan. Biroq davlat apparatining murakkablashuvi va markaziylashuvi korrupsiyaning davlat rivojlanishiga katta to‘siq ekanligini ko‘rsatib berdi.
Korrupsiyaga qarshi kurashda yuqori natijalarga erishgan Shvetsiya, Singapur, Yaponiya, Portugaliya kabi davlatlarning tajribasini o‘rganish shuni ko‘rsatadiki, korrupsiyani yuzaga keltiruvchi omillarni bartaraf etish korrupsiyaga qarshi kurashda muhim o‘rin egallaydi.
Bunda Konstitutsiyaviy nazorat organlari va huquq-tartibot organlarining ahamiyati ortadi. Ya’ni, korrupsiyaga olib kelishi mumkin bo‘lgan normalarni konstitutsiyaviy nazorat organi tomonidan konstitutsiyaga zid deb topish, aholining huquqiy savodxonligini oshirish kabi metodlardan unumli foydalanish ushbu davlatlarni korrupsiya darajasi juda past bo‘lgan davlatlar qatoriga olib chiqqan.
Navoiy viloyati Elektromagnit moslashuv xizmatida ham mamlakatimizni korrupsiya darajasi juda past bo‘lgan davlatlar qatoriga olib chiqish hamda huquqiy bilimlarni yanada yaxshilash maqsadida 2023-yil 22-may kuni navbatdagi o‘quv mashg‘uloti o‘tkazildi.
Mazkur o‘quv mashg‘ulotida Navoiy viloyati Adliya boshqarmasi mas’ul mutaxassisi D.Kattayeva tomonidan O‘zbekiston Respublikasining 2017-yil
3-yanvardagi “Korrupsiyaga qarshi kurashish to‘g‘risida”gi O‘RQ-419-son Qonunining mazmun - mohiyati tushuntirildi. O‘quv mashg‘uloti munozaralarga boy tarzda bo‘lib o‘tdi.
Tayyorlandi: Navoiy viloyati EMMX muhandisi M.Toʻraqulov
