2023-yilning 21-23-sentabr kunlari Qo‘qon shahrida II Xalqaro Hunarmandchilik festivali o‘tkazilishi rejalashtirilgan. Ayni kunlarda Qoʻqon shahrida xalqaro festivalga qizgʻin tayyorgarlik ishlari olib borilmoqda. Shuni inobatga olgan holda Qo‘qon shahrida mobil aloqa qamrovi va internet sifatini o‘rganish maqsadida Farg‘ona viloyati Elektromagnit moslashuv xizmati xodimlari, O‘zbekiston Respublikasi Raqamli texnologiyalar vazirligi Farg‘ona viloyati hududiy sho‘basi, “O‘zkomnazorat” inspeksiyasining Farg‘ona viloyati hududiy sho‘basi bilan hamkorlikda 2023-yil 31-avgust kuni Qo‘qon shahrida radiomonitoring tadbirlari oʻtkazildi.
Farg‘ona viloyati Elektromagnit moslashuv xizmati muhandislari tomonidan maxsus radiomonitoring o‘lchov qurilmalari yordamida Qo‘qon shahri hududida GSM, UMTS, LTE, CDMA standartlarida mobil aloqa qamrovining holati va internet sifati o‘rganib chiqildi.O‘rganishlar natijasida mobil aloqa qamrovi va internet sifati qoniqarli bo‘lmagan hududlar to‘g‘risida ma’lumotlar Vazirlikning Farg‘ona viloyati hududiy sho‘basi orqali mobil aloqa operatorlariga taqdim etilib, qisqa muddatlarda ushbu kamchiliklar bartaraf etildi.
Bu borada amalga oshirilgan har qanday ishlar Xalqaro Hunarmandchilik festivaliga tashrif buyurgan hunarmandlar, chet ellik sayyohlar va shahrimiz mehmonlarini aloqa va internet sifatidan mamnun bo‘lishi uchun muhim ahamiyat kasb etadi.
Tayyorladi: Farg‘ona viloyati EMMX muhandisi D.Koxxorov