2 may kuni Axborot texnologiyalari va kommunikatsiyalarini rivojlantirish vazirligi O'zbekiston Respublikasi Prezidenti devoni xodimlari bilan hamkorlikda «O'zbektelekom» AKning Toshkent shahar telefon tarmog'iga qarashli «Call center» yagona xizmati xodimlari uchun O'zbekiston Respublikasi Prezidentining Virtual qabulxonasiga bo'layotgan murojaatlar bilan ishlashga bag'ishlangan seminar tashkil qildi.
.jpg)
Seminarda ta'kidlanganidek, «Call center» xodimlarining asosiy vazifasi -- ariza beruvchilar uchun qulay sharoit yaratish. Jumladan, har bir murojaatni o'z vaqtida hamda savodlilik bilan qabul qilishga e'tibor qaratish lozim. Bugunga qadar Prezident Virtual qabulxonasiga 724 ming murojaat kelib tushgan bo'lsa, 50 foizidan oshig'i «Call center» operatorlari tomonidan yozib yuborilgan.
O'zbekiston Respublikasini rivojlantirish bo'yicha Harakatlar strategiyasida nazarda tutilganidek, tizimli asosda yuridik va jismoniy shaxslarning murojaatlari bilan ishlash bo'yicha Virtual qabulxona faoliyati, shuningdek hududlardagi Xalq qabulxonalarining faoliyati yo'lga qo'yilishi jamiyatimizda "Inson manfaatlari -- barcha narsadan ustun" degan ezgu g'oyaning amalga oshishiga xizmat qilmoqda.
Bugun aholining to'g'ridan-to'g'ri u yoki bu xizmatni ko'rsatuvchi subyektga murojaat qilishi -- mavjud muammo yoki masalaning yanada tezkor hal etilishiga olib keladi. Boisi, yuqori turuvchi organga kelib tushgan murojaatning ijro uchun yana quyiga yo'naltirilishi vaqtni talab qiladi. Bugun quyi tizimdagi tashkilotlar ham fuqaro murojaatiga jiddiy qarashi kerakligini, natijadan qoniqmagan murojaatchi har qanday holatda Virtual qabulxonaga murojaat qilishi mumkinligini yaxshi anglaydi. Qolaversa, murojaatning mazmuniga ko'ra to'g'ri yo'naltirilishi ham muhim masala. Aynan shu maqsadda ham barcha davlat organlari ham o'zlarining virtual qabulxonalarini tashkil qilishmoqda.
Qo'ng'iroqlarni qayta ishlash markazining operatorlari ishtirokida aholining Virtual qabulxonaga yo'llayotgan murojaatlarini qabul qilish sifatini oshirish, aholi murojaatlari bilan yuzaga kelayotgan tushunmovchiliklar va mavjud boshqa masalalar atroflicha muhokama qilindi. Shuningdek, bu yo'nalishda operatorlar yo'l qo'yayotgan kamchilik va xatolar qayd etilib, tegishli tavsiyalar berildi.
