«Телерадиоэшиттириш тизимлари» кафедрасида талабаларни битирув олди амалиётига йўналтириш борасида

Бундан бироз муддат аввал мен «Электромагнит мослашув маркази» давлат унитар кохонасининг «Техник радионазорат станцияси» бошлиғи Анвар Кадиров билан битирувчи талабалар ва уларни ишлаб чиқаришга йўналтириш юзасидан суҳбатлашган эдим. Ушбу суҳбатда Анвар Кадиров «ЭМММ» ДУК бугунги кунда битирувчиларни амалиётга қабул қилишга тайёр эканлигини ва унда бир қатор битирувчиларга иш таклиф қилинишини ҳам айтиб ўтди.

Шундан сўнг Анвар Кадиров талабалар билан айнан амалиётни ташкил қилиш ва уларни ишга тақсимлаш борасида учрашув ташкил қилиш таклифини берди. Бу таклифдан мамнун бўлган ҳолда камина Алишер Шахобиддинов ва Владислав Губенко тўртинчи курс талабалари билан «ЭМММ» ДУК вакиллари ўртасида учрашув ташкил қилиш юзасидан келишиб олдик.

Мана бугун (1-февраль куни) ана шу учрашув амалга оширилди. «Телерадиоэшиттириш тизимлари» кафедрасига «Электромагнит мослашув маркази» давлат унитар корхонасининг бошлиқ ўринбосари Аваз Хашимходжаев ва «Техник радионазорат станцияси» бошлиғи Анвар Кадировлар ташриф буюрдилар.

Суратда: Анвар Кадиров ва Аваз Хашимходжаев

Учрашув «Рақамли телевидение» ўқув-илмий лабораториясида бўлиб ўтди. Унда «Электромагнит мослашув маркази» ДУК ва унинг ҳудудий филиалларида амалиёт ўташ истагини билдирган 17 нафар талабалар ва декан муовини Жасур Мамажоновлар қатнашдилар.

Суратда: Аваз Хашимходжаев биритувчилар билан мулоқотда

Аввал бошлиқ ўринбосари Аваз Хашимходжаев талабаларга «ЭМММ» ДУК ҳақида, унинг ҳудудий филиаллари ва амалга ошириладиган ишлар тўғрисида гапириб ўтди. Талабаларга ЭМММ томонидан тайёрланган журналларни тақдим қилди ва ҳар бир бўлимнинг вазифаларини ёритиб берди. Сўнгра «Техник радионазорат станцияси» бошлиғи Анвар Кадиров радиочастота ресурсларини назорат қилиш, фойдаланишга руҳсат бериш ва тегишли амалиётлар юзасидан маълумот берди. Буларнинг барчаси апрель-май ойларида ташкил қилинадиган битирув олди амалиётига жалб қилиш мақсадида амалга оширилди.

Учрашув сунгида талабалар билан яқинроқ суҳбат амалга оширилди ва «ЭМММ» ДУК ва унинг ҳудудий филиалларида амалиёт ўташни истаган битирувчилар учун тегишли кўрсатмалар берилди.

Суратда: Анвар Кадиров ва битирувчи Рустам Хасанбаев

Умид қиламизки, бу учрашув «ЭМММ» ДУК ва битирувчи талабалар учун ўзаро фойдали бўлди ва фурсатдан фойдаланиб Аваз Хашимходжаев ва Анвар Кадировларга ўз миннатдорчилигимизни билдирамиз. Битирувчиларимизга эса ўз касбий фаолиятларида доимо юксак чўққиларда бўлишларига тилак билдирамиз.

Ўйлаймизки, бу  турдаги учрашувлар учинчи курс талабалари ўртасида ҳам тез орада ташкил қилинади. Ҳар қалай бунинг учун барча имкониятлар мавжуд. Асосийси, ҳохиш бўлса бас…